सोशल मीडियावर व्हिडिओ प्रसारित केल्याचा गुन्हा रद्द
पणजी : सोशल मीडियावर व्हिडिओद्वारे मुख्यमंत्री डॉ. प्रमोद सावंत यांच्याविरोधात बदनामी केल्याप्रकरणी, गोवास्थित मुंबई उच्च न्यायालयाने गौरव बक्षी याला ५० हजार रुपयांचा दंड ठोठावला आहे. बक्षीने माफीनामा सादर केल्यानंतर न्यायालयाने त्याच्याविरोधात गुन्हे शाखेने दाखल केलेला गुन्हा रद्द करण्याचा आदेश दिला. न्या. भारती डांगरे आणि न्या. आशिष चव्हाण यांच्या द्विसदस्यीय न्यायपीठाने हा निर्णय दिला.
गौरव बक्षी याने मुख्यमंत्री डॉ. प्रमोद सावंत यांच्यावर राज्याच्या वनक्षेत्रात घट होण्यास जबाबदार असल्याचा दावा केला होता. या संदर्भात त्याने फेसबुक, इंस्टाग्राम आणि इतर सोशल मीडिया प्लॅटफॉर्मवर व्हिडिओ प्रसारित केला होता. याची दखल घेत वनसंरक्षक आदित्य मदनपात्रा यांनी गुन्हे शाखेत तक्रार दाखल केली. तक्रारीनंतर गुन्हे शाखेने २ जुलै रोजी बक्षी याच्याविरोधात गुन्हा दाखल केला.
हा गुन्हा रद्द करण्यासाठी बक्षीने गोवास्थित मुंबई उच्च न्यायालयात याचिका दाखल केली. सुनावणीदरम्यान बक्षी याच्यातर्फे अॅड. नाईजल कोस्टा फ्राईज यांनी युक्तिवाद केला. बक्षीने मीडिया आणि विरोधी नेत्यांच्या पत्रकार परिषदेतील माहितीवरून सदर व्हिडिओ प्रसारित केल्याचा दावा केला. सरकारी अभियोक्ता सोमनाथ कर्पे यांनी व्हिडिओ आणि त्याची स्क्रिप्ट न्यायालयात सादर केल्यानंतर, न्यायालयाने बक्षीला फटकारले. त्यानंतर बक्षीने या संदर्भात प्रतिज्ञापत्र सादर करून माफी मागितली. न्यायालयाने बक्षीचा माफीनामा स्वीकारून त्याला ५० हजारांचा दंड ठोठावला आणि संबंधित रक्कम गोवा फाऊंडेशन या बिगर सरकारी संस्थेला देण्याचे निर्देश दिले. त्यानंतर न्यायालयाने गुन्हे शाखेत दाखल झालेला गुन्हा रद्द केला.
